Friday, February 3, 2012

Partýkisa segir: Bank of fun



Tíminn líður hratt, á gervihnattaröld (HRAÐAR SÉRHVERN DAG, HRAÐAR SÉRHVERT KVÖÖLD!) Þið afsakið Eurovision möngólið mitt, það er löngu búið að vara ykkur við þessu.

Hinsvegar hef ég gripið til Gleðibankans til að fæla út annað lag úr höfði mínu sem hefur setið fast þar í marga marga marga daga. Ég hef hugleitt að skríða inn í hátalara og vonandi verða svo heppin að fá tinitus (fyrir ykkur sem eruð fáfróð þá er tinitus bágt í eyrunu og maður heyrir suð alla daga það sem eftir er af lífi....sssszzzzzzsssszzzz)
Vinningslagið sem hefur tekið sér bólfestu í heilanum mínum er hvorki meira né minna en jólalagið ,,Þú komst með jólin til mín" Kannski get ég fengið prest og sært út Bó og jólagestina hans alla: ÚT BÓ! ÚT MEÐ ÞIG OG ÞITT HAFURTASK! (þú ert velkominn aftur um jólin) EN ÚT MEÐ ÞIG NÚNA! FEBRÚAR ER EKKI JÓLALAGAVERTÍÐ!

Litlir Bleikir fílar hafa ákveðið að grípa til flöskunnar í þessu leiðinda Bó vs. Gleðibanka máli og vona þess af öllu hjarta að áfengi í bland við hjartaáfalls orkudrykki og morgunverðardjús muni á einhvern hátt fá þá til að líða betur. Við erum orðin örvæntingafull og EKKERT er brjóstumkennanlegra en örvæntingafullir litlir bleikir fílar og einn stór ADHD köttur.
Senn líkur þessu föstudagsmorgunsblöggi og mögulega má ekki eiga vona á öðru blögging fyrr en á sunnudaginn eða jafnvel mánudaginn. (það kemur samt örugglega blöggs á morgunn, þið vitið það alveg en ég myndi vilja halda að ég ætti líf, svo er samt ekki.)
Við kveðjum með skemmtilegir mynd af partý kisu. Upprunalega ætlaði ég að setja inn mynd af kisu með 3 bjórdósir á hausnum og trúið mér, hún var ekki sátt með þau mál enda drekkur kisi ekki bjór, aðeins sterkt áfengi með lítilli regnhlíf í.
En svo fannst þetta líka ótrúlega hryllilega ljóta málverk sem einhver aumingjans sálin málaði.
Ef þið voruð ekki búin að fá martröð hingað til þá GJÖRIÐISSVOVEL!

Thursday, February 2, 2012

Flöffí: more is better, baby!

Nú ætla Litlir Bleikir Fílar að klæða sig í hreinskilnisbuxurnar sínar sem líta svona út:
Jæja, nú líður mér miklu betur. Nú finnst mér ég getað virkilega opnað hjarta mitt og sagt ykkur, litlu lirfurnar mínar, eitt af mínum hjartans málum. Þannig er nú mál með vexti að ég-elska-brúðkaup. Elska þau. ELSKA ÞAU!
Það vill svo til að Litlir Bleikir Fílar eru ekki giftir enn. Þeir eru vissulega fráteknir en hafa ekki látið pússa sig saman frammi fyrir hinum háheilaga Elvis Presley. (Litlir Bleikir gifta sig eingöngu í Las Vegas, ekkert annað til umræðu)
Nú ætla ég að koma mér að efninu sjálfu. Staðfest hefur verið að ég elska brúðkaup. En gaman og ótrúlega ómerkilegt. Það sem okkur bleiku fílunum langar til að deila með ykkur tengist brúðkaupum. En þessi brúðkaup eru ekkert venjuleg. Ónei! Þetta eru brúðkaup af þeirri stærðargráðu að Vera Wang (BRÚÐARKJÓLA-MESSÍAS, fyrir þá sem þekkja ekki til) myndi örugglega borða blásýrumuffins (FAT FREE!) og kafna úr lungnafroðu ef hún sæi þessa brúðarkjóla sem ég mun senn gleðja ykkur með. Haldið ykkur fast:
Ég brjálazt.
Þetta er ekki kona sem flæktist inn í Candy Floss vél og lenti svo í því leiðinlega tilviki að festast inn í Pony hesta ælupest og stuðningshópknúsi fyrir drykkfelda Kærleiksbirni!
Þetta er kona sem er í sérsmíðuðum, nýþungum, eflaust mjög óþægilegum, ljósleiðaravæddum brúðarkjól (það hlítur að vera internet inni í þessu) Og jú! Þið sjáið rétt! Það er ljós í honum! Af hverju í ósköpunum? Ætlar hún að setjast niður á eftir með góðan reifara og vantaði lesljós? Þetta er kast, ofan á flog og tuttuguogsex númerum of brjálað.
Þetta gerðist í alvörunni og ykkur til mikillar heppni voru herlegheitin einnig fest á filmu fyrir þættina My Big Fat Gypsy wedding. Ég ætla ekki að skemma fyrir ykkur spennuna en þessir þættir eru ekki bara mergjaðslega skemmtilegir, þeir eru mergjaðslega skemmtilegir Í TÓLFTA VELDI!
Í stuttu máli: þættir að mínu skapi.
Litlir Bleikir Fílar kveðja að sinni.
Veriði hress, bless bless, ég er fress. (djók, ég er bleikur fíll)


Wednesday, February 1, 2012

顔黒/SKINKUR


Skinkur. Ég set þær stundum saman við ost og brauð og þessi heilaga þrenning myndar grillaða samloku.
Sem er gaman.
Skinkur eru líka stundum í mannslíki og ég sé þær til dæmis á Stjörnutorgi á meðan ég borða grilluðu samlokuna mína.
Sem er líka gaman.
Eiginlegur ,,skinkusamruni" ef svo mætti koma að orði. (Þetta er að öllum líkindum röng notkun á gæsalöppum, WHATEVERZ!)

En hvaðan kemur þessi undarlegi þjóðfélagshópur? Hver er saga þeirra og menning? Hver er þróun þeirra annars staðar í heiminum og hvernig hafa þær aðlagast íslensku samfélagi? Tala þær sitt eigið tungumál? Eru þær með þjóðarrétt? Kjósa þær innbyrðis leiðtoga? Er mikið læsi á meðal skinkna?
Þetta eru spurningar sem ég hef velt vöngum yfir, sérstaklega yfir grillaðri samloku. Ég hef hugleitt að fá mannfræðiprófessörr nokkurn sem ég þekki til að ganga í þessi mál með mér en hingað til hef ég unnið ein að þessum óformlegu rannsóknum mínum og heimspekilegu pælingum hvað varðar þessa djúpappelsínugulu styggu svínakjötsskepnu.

Ég ætla að uppljóstra aðeins um niðurstöður mínar hingað til:
Skinkur eru upprunalega frá Japan (auðvitað!) Tískan þar kallast Ganguro og þýðir það Svart andlit eða jafnvel Sólbrennt smetti.
(Þetta kemur allt frá Wikipedia; Ath! doktorsnemar í japanskri menningarfræði með séráherslu á japanska poppmenningu á árum 1990-2000 mega EKKI vera með stæla og tala um misræmi og tilbúnar staðreyndir og falskar minningar!)
Ganguro var tískubylgja sem náði hámæli (climax!) um aldamótin seinustu og einkenndist hún af aflituðu eða appelsínugulu hári og gróflegri notkun á brúnkukremi. Sem sagt: Skinkur! Gaman af þessu!
Sminkið var svo ekki af verri endanum; mögulegt er að Panda birnir hafa verið einhverskonar innblástur fyrir þessar dömur enda eru augun algjörlega kolbikasvört og svo snjóhvítur augnskuggi utan um það, upp að hárlínu og niður á kinnar. WHAT A CLASSY LADY! Varnirnar eru svo snjóhvít/bleikar. Gerviaugnhár (alveg mörg sett) og LÍMMIÐAR kóróna svo verkið og setja virkilega punktinn yfir i-ið!
Hér má sjá eina japanska telpu sem virðist fylgja Ganguro lífstílnum. Drottinn blessi hana og veiti henni styrk þegar dagur kemur að kvöldi og hún neyðist til að taka þetta SPARSL framan úr sér. Hæversk ung snót með öllu, augljóslega.
Litlir bleikir fílar óska ykkur gleðilegs miðvikudags og biðja ykkur endilega um að skilja eftir ykkur smá kossafar hér á síðuna eða viðeigandi kveðju. Fílarnir hvetja alla til að skrifa undir leyninefni því þá mega menn segja það sem þeir vilja og aldrei er steikin betri þá.
Kv. Litlir Bleikir Fílar og Sortuæxlis Ganguro stelpan sem virðist ætla sér að pissa á almannafæri. Skvíza!

Tuesday, January 31, 2012

Eggjastokkar með stæla og sokkaleysi í ræktinni

Já. Sem sagt. Titillinn dregur daginn minn saman í eina setningu. Þetta eru tveir hlutir sem ég hata af mikill ákefð og ástríðu.
Byrjum á ákveðnum eggjastokk sem ég er í FÝLU út í. Okey okey, ég skil, þú þarft að skila af þér eggi. Það þarf að losna og fara í skemmtiskokk niður hálsinn á leg-gellunni minni. Fine. Það er þitt starf og ég er ekki að dæma. Við þurfum öll að borga reikninga, handrukkara, lýtaaðgerðir etc.
Það sem ég er ekki SÁTT VIÐ er að þessi eggjakunta sem fór í leghálsgöngutúr í dag ákvað að vera lúxustussa og berja mig að innan með einhverju sem hlítur að líkjast hafnarboltakylfu eða sleggju. Eða mjög stóru barni. Flenni barni gætu sumir sagt.
Og ég vara bara EKKI AÐ LÖVA ÞAÐ.
Það var bara ógeðslega vont. Ég óverdósaði á Paratabs, sofnaði og dreymdi martröð þar sem mamma mín seldi mig í hórdóm-og henni fannst það bara helvíti sneddí.
Ömó í einu orði.
Snúum okkur að seinni hluta þriðjudagsgeðvondsku minnar: Skólaust fólk í ræktinni.
Í fyrsta lagi: OJBARA!
Í öðru lagi: EF ÞÚ ÁTT EKKI SKÓ ÁTTU EKKI EFNI Á AÐ BORGA 4.974,- KR. Á MÁNUÐI Í LÍKAMSRÆKT. Do the math maðurfukker.
Í þriðja lagi: Ái! Hversu óþægilegt er að vera hamast á einhverju djöflans brennslutæki í 40 mínútur, alveg kófsveitt að reyna ekki að kafna-á táslunum!!
Í fjórða lagi: Það er BANNAÐ að vera skólaus. Og ert þú bara yfir það hafinn? Ert þú betri en allir aðrir og gerir bara það sem þú villt? (Hér er bannað að vitna í lagið Ég geri það sem ég vil með Skyttunum)
Í fimmta lagi: Ef þú ætlar að vera í fokkings ógeðis sokkum og trufla okkur hin með ógeðslegu fokkings sokkunum þínum þegar VIÐ sem förum eftir settum reglum og kurteisiviðmiðum erum að reyna einbeita okkur að betri sál í spengilegri líkama VERTU ÞÁ Í FLOTTUM SOKKUM RASSAHAUS! Ekki vera í upplituðum gráfölum, hnökruðum Intersport sokkum sem þú fékkst gefins þegar KR varð 100 ára. Það er fjallans 13 ár síðan!!
Oj þú þér herra minn! Oj þú þér!
Núna er það súkkulaði í sárabætur og plott gegn einum eggjastokk sem þið megið vorkenna. (múhaha!)

Monday, January 30, 2012

Latari en gólfteppi


Ég er löt. Það skal bara viðurkennast, skjalfestast, staðfestast hér með. Ekki nóg með það þá er ég ótrúlega leiðinleg útgáfa af latri manneskju, METNAÐAR-letingi. *Stjörnuauðnuleysingi* er líka skemmtileg varíasjón. Metnaðarletingjar eru þannig að guði gerðir að þeir eru í algjörri afneitun um að vera letingjar. Þeir gerast jafnvel vel svo ógeðslega grófir að segjast vera duglegir. Hah! Aðeins rögluð ugla myndi staðfesta það að ég væri á einhvern hátt dugleg. (Nú fær kærastinn flog, hann er minn helsti aðdáandi og finnst ég vera ofurmenni ef ég strauja eina skyrtu ((hún var straufrí hjartagull...))
Verandi eðalbikkja eða lúxusaumingi þá er ég óskaplega góð í að láta líta út fyrir að ég sé bara á fullu allann daginn og geti jafnvel framkvæmt mörg verk í einu, eins og t.d að skúra 2X þakið á húsinu mínu á meðan ég litaraða augnskuggunum mínum og endurskrifa allar glósurnar mínar þar sem hver stafur er skrifaður með spes lit (A er bleikt,jeij)
Í sannleikanum sagt þá í einlægni minni segi ég ykkur að ég er ekki svona dugleg. Ég verð bara að vera hreinskilin. Sem dæmi þá vaknaði ég í morgun við gjallahorn pabba stranga (betur þekkt sem Nokia vekjaraklukkan og sadó-masó mómentið okkar hjúanna-love it!)
Og krakkar ég ætlaði svoleiðis að own-a þennan dag. Ég ætlaði að lesa sex sinnum í röð allt efnið í rekstrarhagfræði og verða svo sjóuð í verðteygni eftirspurnar að íslenska ríkið myndi búa til stöðu fyrir mig í ríkisstjórninni og ég myndi vinna fyrir 18 kúlur á mánuði undir starfsheitinu:
,, Ógeðslega sjóðheita gellan sem kann allt um rekstarhagfræði"
Truth be told: ég las eina glæru. Á tæpum 3 klukkutímum. Og ég var með lokað fyrir allar helstu heimasíður sem ég heng inn á. Og ég var ekki með peninga svo ég gat ekki hangið í Hámu að borða kex. Og ég þekki engan inni á lezzstofu sem ég gat talað við. Og ég fór ekki í tíma. Og síminn hringdi aldrei. Og ég fór bara einu sinni að pissa.
HVERSU JABBA-THE-HUT LÖT ER ÉG EIGINLEGA?
Persónulegt lufsumet að minni hálfu. (jeij! þá áorkaði ég allavega einhverju í dag...kv. Pollíanna)

Saturday, January 28, 2012

Birta, bíddu eftir mér. Mér leiddist hér um tíma en nú langar mig með þér


Nú er sko spenningur í mannskapnum krakkar mínir.
Já það held ég nú bara aldeilis alveg barasta já!
,,Af hverju eru litlir bleikir fílar gjörsamlega að rífa sig úr nærbuxunum af spennu?" gætuð þið elskurnar mínar spurt ykkur sjálf og klórað ykkur í hausnum svo flösunni alveg kyngir niður á axlir.
ÞAÐ ER UNDANKEPPNI EUROVISION!
Hey hey! Bannað að hrista hausinn. Alveg bannað. Hættu að dæma mig. Ekki þú dæma mig þó ég sitji á laugardagskvöldi ásamt heimilismönnum og horfi með hjartað í buxunum á hvert topplagið á fætur öðru. Þetta er mér dálítið erfiður tími því mér finnst svo mörg lögin góð og það er erfitt að sjá þau ekki öll fara út í aðalkeppnina. Eins og að missa nokkur börn í röð. Eða, ég á engin börn-ég hef bara átt gullfiska og einn páfagauk sem dó og ég sakna bara ferlega mikið. Ok, sem sagt, eins og að missa páfagaukinn sinn; þið sem þekkið það getið tengt við þessa erfiðu andlegu upplifun (R.I.P DAGUR!)

Ef þið eruð ekki enn sannfærð um ágæti þessa misskilda menningarkima þá ætla ég bara að koma með nokkra punkta:
*Næsta keppni verður haldin í Azzerbædjan-Hversu kinkí er það?
(ÉG MINNI Á AÐ ÞETTA ER STAFSETNINGARFRÍTT RÍKI)
*Tækifæri til að eyða 4 mánuðum í að stúdera ógrinni af eurovisionlögum, prenta út textann og læra hann. Horfa svo á öll myndböndin, stúdera þau og jafnvel læra dansrútínu bakdansarana og ég tala nú ekki um að mynda umræðuhóp með góðu fólki til að taka þessar pælingar upp á næsta stig og hafa gaman af.
Svo er bara CLIMAX 26. maí. Ó boj, ó boj!
Þið fáið að heyra meira um þetta börnin góð.
Fariði nú að gera eitthvað vitulegra en að lesa þetta litla fílasmjatt mitt.
Bless og knús.

Friday, January 27, 2012

Til Stefáns.

Hæ þið öll.
(Þið eruð kannsi þrjú, en það er allt í lagi. Ég ætla ekki að gera lítið úr ykkur þó þið hafið ekkert betra að gera með lífið ykkar en að lesa þetta. Engin skömm í því, veriði stolt!)

Þetta er fyrir Stefán sem finnst að ég eigi ekki að sitja á sjálfri mér og leyfa engum að heyra hvað ég er sérleg smjattandi rugluð í hausnum. Ég geri mitt besta við að vera eins eðilega venjulega leiðinleg og ég mögulega get dagsdaglega. Sem þýðir að ég hlít að virka alveg hrikalega bæld manneskja, eins og rostungur sem er í dulagervi afgreiðslustúlku La Senza;
,, Get ég ekki aðstoðað??????!!!!"
Svo það er kannski bara best að ég spúi hér út öllu því sem kemst ekki í gegnum ritskoðunina mína, sem vinnur eftir sama fyrirkomulagi og ritskoðunarnefnd ákveðins kóreu lands sem er kennt við norður.
Ég hef þetta ekki lengra að sinni útaf þremur einföldum ástæðum.
1) Tölvan mín/Talvan mín/Völvan mín (ég mun ekki leiðrétta málvillur, stafsetningarvillur né staðreyndarvillur. Allar uppástungur um annað verða ignoraðar auk þess sem sá hinn sami Besservisser mun missa framtennurnar.) Talvan mín er orðin svo heit að ég er mögulega komin með 2. stigs brunasár í klofið. Það er kannski jákvætt, kannski neikvætt.
2) Ég þarf að pissa og mín pissublaðra er jafn stór og hjá smágerðum Chiváva hundi. Auk þess verð ég ofbeldisfull þegar mér er mál. Sönnurgögn fást hjá sambýlismanninum.
3) Ég ætla frekar að eyða tímanum í að horfa á Youtube myndbönd sem bera heitið: Funny cat video.
Bæj.